අයිස් ජාවාරමේ යෙදුණු බව කියන පුද්ගලයකුට මෝටර් රථයකින් පැමිණි පුද්ගලයන් කීපදෙනකු විසින් කළ වෙඩි තැබීමකින් බරපතළ තුවාල ලැබූ ජාවාරම්කරු කොළඹ ජාතික රෝහලට ඇතුළත් කිරීමේදී මියගොස් ඇති බව ග්‍රෑන්ඩ්පාස් පොලිසිය කියයි.
මියගිය පුද්ගලයා මාදම්පිටිය කනත්ත අසල ත්‍රිරෝද රථයක පිටුපස ආසනයේ සිටියදී මෙම වෙඩි තැබීම සිදුකර ඇති බව පොලිසිය පවසයි. එම වෙඩි තැබීමෙන් මියගොස් ඇත්තේ අවුරුදු 35 ක් වන මිහිජය සෙවණ ප්‍ර දේශයේ පදිංචි පුද්ගලයකු බව පොලිසිය පවසයි.මෙම වෙඩි තැබීම සදහා සැකකරුවන් පිස්තෝල වර්ගයේ ගිනි අවියක් භාවිත කර ඇති බව පොලිස් ස්ථානීය පරීක්ෂණ නිලධාරීන් සිදුකළ විමර්ශනවලදී අනාවරණයවී ඇත.
මත්ද්‍රව්‍ය ජාවාරම සම්බන්ධයෙන් ඇති වූ ආරවුලක් මත මෙම වෙඩි තැබීම සිදුවන්නට ඇති බවට පොලිසිය සැකපළ කරයි. සී.සී.ටී.වී දර්ශන ඔස්සේ විමර්ශන අරඹමින් සැකකරුවන් අත්අඩංගුවට ගැනීම සදහා ග්‍රෑන්ඩ්පාස් පොලිසිය වැඩිදුර විමර්ශන සිදුකරයි. කොළඹ උතුර දිසාව බාර ජ්‍යෙෂ්ඨ පොලිස් අධිකාරී කේ.එස්.කේ. රූපසිංහ මහතාගේ උපදෙස් පරිදි ග්‍රෑන්ඩ්පාස් පොලිසියේ ස්ථානාධිපති ප්‍රධාන පොලිස් පරීක්ෂක එච්.එස්. හැරිසන් මහතා ඇතුළු නිලධාරීහු වැඩිදුර විමර්ශන සිදුකරති.
Comments